(17 марта 2015) Пĕлтĕр пуçласа янă районсен хушшинчи «Беловка йĕлтĕр йĕрĕ» ăмăрту Аксу районĕнчи Беловкăра кăçал та ăнăçлă иртрĕ. Мартăн 1-мĕшĕнче 10 сехет тĕлне пĕтĕмпех хатĕрччĕ: регистраци пункчĕ (Федоровка ялĕнче пурăнакан Н.П.Макаркинăн «УАЗ» машини), фельдшер пункчĕ (Çĕнĕ Ӳсел ялĕнчи фельдшер Г.Фаттыхова), çĕнтерӳçĕсене палăртма пьедестал (И.К.Кожеманов туса хатĕрленĕ), вĕри чей (П.П.Ефимов), музыка (С.Х. Жирнов, С.В.Уланов, Н.В.Гаврилов), шашлык, суту-илӳ («Людмила» лавкка).
Ăмăртăва Аксу, Нурлат районĕсенчен йĕлтĕрçĕсемпе куракансем килнĕччĕ. Шел пулин те, Çарăмсан, Алексеевски тата Элкел районĕсенчен кăçал килеймерĕç, хăйсем патĕнче ăмăрту ирттерчĕç. Йĕлтĕрçĕсен ӳсĕмĕ те тĕрлĕрен – ултă çултан пуçласа çитмĕле çитнисем те хутшăнчĕç.
Ертсе пыракан Т.И.Бульбова хăнасемпе, спонсорсемпе паллаштарса уява уçнă хыççăн килнисене Аксу районĕн ĕçтăвкомĕн ертӳçин çумĕ С.В.Александров, Аксу районĕн çамрăксен ĕçĕсен тата спорт уйрăмĕн пуçлăхĕ С.Ю.Зайцев, Аксури ача-пăча спорт шкулĕн ертӳçи Н.И.Хисматов ăшшăн саламларĕç, Аксури ДОСААФ пуçлăхĕ П.В.Волков çак ăмăртăва Аслă Çĕнтерĕве 70 çул çитнине халаллама ыйтнине халăх тăвăллăн алă çупсах йышăнчĕ. Малалла «Беловка йĕлтĕр йĕрĕн» хуçисем А.П.Бульбовпа В.И.Кожеманов сăмах илчĕç. Ăмăртакансене ăнăçу сунчĕç, ăмăрту йĕркипе паллаштарчĕç…