(24 ноября 2015) Чăваш наци конгресĕн пайташĕсем: пресс-служба ертÿçи Зоя Яковлева, И.Н.Ульянов ячĕллĕ ЧПУ профессорĕ, культуролог Владимир Васильев тата Кÿкеçри «Бичурин тата паянхи самана» музей директорĕ Ирина Удалова Тюмень тăрăхĕнчи чăвашсен «Тăван» Ассоциацийĕ «Бичурин вулавĕсем».
Паллă мероприятине чăваш историне, культурипе йăли-йĕркине тата тăван чĕлхене аталантарас тĕллевпе ку тăрăхра вуннăмĕш хут ирттереççĕ.
Чÿк уйăхĕн 20-мĕшĕнче, конференцин пленарлă ларăвĕ пынă вăхăтра ятарлă видеоçыхăну йĕркелерĕç. Унта Шупашкартан Информаци политикипе массăлла коммуникацисен министрĕ Александр Иванов, Культура, нацисен тата архив ĕçĕсен министрĕн тивĕçĕсене пурнăçласа пыракан Константин Яковлев, ЧНК Президенчĕн пĕрремĕш çумĕ Валерий Клементьев, президиум пайташĕсем Юлия Анисимова тата Геронтий Никифоров хутшăнчĕç. Тюмень хулин патшалăх университечĕнче иртекен Бичурин вулавне хутшăнакансем вара чылайăн пулчĕç. Кунта Тюмень облаçĕн правительствин наци ĕçĕсен комитечĕн ертÿçин çумĕ Владислав Чернов, Çĕпĕрпе Урал тăрăхĕнчи чăвашсен пĕрлĕхĕсен координаторĕ Владимир Логинов, Тюмень тăрăхĕнчи чăвашсен «Тăван» Ассоциацийĕн ертÿçи Ираида Маслова, Сургут хулинчи, Екатеринбург, Челябинск тăрăхĕнчи чăвашсен пĕрлĕхĕсен ертÿçисем Татьяна Кузьмина, Дмитрий Николаевпа Екатерина Тельцова тата паллă ăçчасхсем, чăваш хастарĕсем, студентсем хутшăнчĕç.
Видеоçыхăнăва Тюмень енчен Владислав Чернов пуçларĕ. Вăл пирĕн министрсене тата ЧНК пайташĕсене Тюмень тăрăхĕнче наци политикине мĕнле тытса пынипе паллаштарчĕ, кунти чăвашсем хастар пулнине палăртрĕ. Шупашкартан Информаци политикипе массăлла коммуникацисен министрĕ Александр Иванов телеçыхăнăва малалла тăсрĕ:Тюмень тăрăхĕнчи ертÿçĕсене наци политикине, уйрăмах чăвашсен пĕрлĕхне тимлĕх уйăрнăшăн тав турĕ, Бичурин вулавĕсене ăнăçлă ирттерме сунчĕ.
Çĕпĕрпе Урал тăрăхĕнчи чăвашсен пĕрлĕхĕсен ĕçне йĕркелесе тăракан Владимир Логинов Чăваш Ен правительствине тулайра пурăнакан чăвашсене пулăшса пынăшăн тав турĕ, чылай çул Тутарстанра чăваш культурипе чĕлхине сыхласа хăварса аталантарассишĕн тăрăшнă Константин Яковлева Çĕпĕрпе Урал тăрăхĕнчи ентешсем çĕнĕ вырăнта, ЧР Культура министрĕн яваплă ĕçĕнче ăнăçлă ĕçлеме суннине пĕлтерчĕ.
Малалла Тюмень тăрăхĕнчи «Тăван» ассоциаци ертÿçи Ираида Маслова наукăпа практика конференцине çÿллĕ шайра ирттерни пирки каласа пачĕ. ЧНК пайташĕсене Зоя Яковлевана тата Владимир Васильева «Чуваши с сибирским характером» документлă фильм ÿкернĕ ятпа тав тунине пĕлтерчĕ. Видеофильм пахалавĕ те Бичурин вулавĕнче иртни лайăх пулăм пулнине каларĕ.
Сургут чăвашĕсен пĕрлĕхĕн ертÿçи Татьяна Кузьмина ку фильм авторĕсене Хисеп хучĕсемпе чысларĕ.
Шупашкартан видеоçыхăва малалла ЧР Культура министрĕн тивĕçĕсене пурнăçлакан Константин Яковлев тăсрĕ. Вăл Тюмень облаçĕнчи чăвашсем хастар пулнине палăртрĕ, çакнашкал наукăпа практика конференцисем ирттерни вĕсен ĕç пахалăхĕ тата та ÿснине пĕлтернине, Чăваш Ен ертÿçисем хамăр ентешсене яланах пулăшма хатĕррине каларĕ. Унăн сăмахĕсене çирĕплетсе ЧНК президенчĕн çумĕ Валерий Клементьев Çĕпĕр чăвашĕсен пĕрлĕхĕсен ертÿçисене ялан çапла туслăн пĕрле ĕçлеме чĕнсе каларĕ.
Видеоçыхăну вĕçĕнче Тюмень чăвашĕсен пултарулăх ушкăнĕсем Шупашкарсене тăван чĕлхепе юрă парни турĕç.
Телеçыхăнăва йĕркелекенсем çакнашкал мелсемпе ĕçлени чăваш наци культурипе йăли-йĕркине, чĕлхене анлăн сыхласа хăварса аталантарма, тулайра пурăнакан чăвашсемпе туслăха тата та çырĕплетме май панине, Чăваш Ен вĕсене манманнине пĕлтернине палăртрĕç.