(7 декабря 2016) Раштав уйăхĕн 3-мĕшĕнче Чӑваш наци конгресӗ йĕркеленипе, Чăваш Республикин культура министерстви пулăшнипе «Ахах-мерчен аваллăхĕ» ятлă чăваш халăх тумĕн уявĕ пирĕн çĕршывăн тĕп хулинче Мускавра иртрĕ. Чăваш Енре кăçал Ĕç çынни çулталăкĕ пулнине шута илсе çак уява Чăваш Республикин культурăн тава тивĕçлĕ ĕçченне, Чăваш наци конгресĕн халăх ăстисене пĕрлештерсе тăракан Ассоциацин ертÿçине, халăх ăстине Зинаида Вороновăна халалланă.
Ĕçлĕ çын яланах хисепре. Ÿнер тĕнчинче нумай çул тăрăшакан Зинаида Воронова кăçал 65 çул тултарчĕ тата вăл чăваш тумĕсемпе ĕçлеме пуçланнăранпа 25 çул çитрĕ.
Чăваш Республикин культурăн тава тивĕçлĕ ĕçченĕ, Чăваш Республикин халăх ăсти Зинаида Воронова чăнах та мухтава тивĕçлĕ.Чăваш тумне сума суса тата ăна ăсталакана хисеплесе Мускаври «Красный Октябрь» культура керменне ЧНК хастарĕсем: ĕç тăвакан комитет председателĕн çумĕ Нина Андреева, грантсемпе ĕçлекен координатор Елена Светлая поэт, культура комитечĕн пайташĕсем Наталья Васильева хореограф тата Дмитрий Петров артист, пресс-служба ертÿçи Зоя Яковлева, Чăваш Республикин тава тивĕçлĕ артисчĕ Мария Горшкова, Вячеслав Вахтеркинпа Василий Николаев юрăçсем çитрĕç.Кунтах хăйсен вĕрентекенне Зинаида Ивановна Воронована Мускав чăвашĕсен умĕнче сумлăн кăтартас шутпа Чăваш патшалăх культурăпа искусствăсен институтĕнче вăй хуракан Раиса Васильева доцентпа студентсен «Мерчен» ушкăнĕ те килнĕ.
Чăваш наци конгресĕн Комсомольски районĕнчи уйрăмĕн ертÿçи, «Каçал» халăх ансамблĕн ертÿçи Владимир Павлов тăрăшнипе юлашки вăхăтра конгресăн чылай ĕç-пуçне «Каçал» халăх ансамблĕ хутшăнать. Мускаври чăваш тумĕн уявне те çак пултаруллă ушкăн илем кÿчĕ.
Пĕр хушă «Красный Октябрь» культура керменĕ чăваш юрри-ташшипе кĕрлесе кăна тăчĕ: фойере «Каçал» ансамбль Мускав халăхне чăваш юррипе ташшипе кĕтсе илчĕ, ташлаттарчĕ, Шупашкартан килнĕ халăх ăстисем суту-илÿпе курав йĕркелерĕç. Чăваш патшалăх культурăпа ÿнер искусствисен институчĕн кафедра ертÿçи Раиса Васильева курма килнисене чăваш тĕррине тĕрлеме вĕрентрĕ. Вăрнарти аш-какай комбиначĕ, «Пир-авăр çăтмахĕ», «Акконд» предприятисем хăйсен таварĕсене мускавсене сĕнчĕç.
Чăваш тумĕн уявне Раççей Федерацин Президенчĕ çумĕнчи Чăваш Республикин вăхăтлăха пурнăçласа пыракан полномочилле представителĕ Валерий Шакин, Патшалăх Думин депутачĕсем Анатолий Аксаковпа Олег Николаев, Мускаври чăваш культурин центрĕн ертÿçи Лира Смирнова тата ытти хастарсем çитрĕç. Вĕсем ЧНКра тăрăшакансене çакнашкал илемлĕ уяв йĕркеленĕшĕн тав турĕç, Зинаида Ивановна Вороновăна чӑваш тумĕн пĕлтерĕшне ҫӗкленӗшĕн, унăн пуласлăхне çамрăк ăрăва парас ĕçре ырми-канми ĕçленĕшĕн тав туса чечек çиххисем парнелерĕç.
Телее кашни çын хăйне май ăнланать. Пĕри – сăнпа илемлĕ пулнипе телейлĕ. Тепри – мул-пуянлăх пуррипе хăпартланать. Хăшĕ ашшĕ-амăшĕ пухнă тупрапа усă курма хавас. Тата теприсем нумай вĕренсе пĕтĕм халăхшăн усăллă ĕç тунипе хăйсене чăн телейлĕ тесе шутлаççĕ. Çав çынсен шутне Зинаида Воронова кĕрет. Мускавра иртнĕ чăваш тумĕн уявĕнче куракансем çакна хăйсем курса ĕненчĕç. Зинаида Ивановна ăсталанă чăваш тумĕсенчен кунта дефиле йĕркелерĕç. Чăн та, мĕнле илемлĕ те капăр пирĕн чăваш тумĕ. Пирĕн мăн асаттесемпе асаннесем хăйсен ĕмĕрне çĕр çинче ĕçлесе ирттернĕ. Темле йывăр пулсан та илемлĕ те тирпейлĕ çÿренĕ вĕсем. Халăх ăсти Зинаида Воронова ăсталанă кашни чăваш çи-пуçне тата кашни артист юрланине, ташланине Мускаври пирĕн ентешсем тăвăллăн алă çупрĕç, тав турĕç.
Мария Горшкова, Василий Николаев, Вячеслав Вахтеркин юрăçсем, «Каçал» фольклор ушкăнĕ тата «Мерчен» ташă ансамблĕ пĕрре мар сцена çине тухса Мускав чăвашĕсене савăнтарчĕç.
Кунти чăваш культурин центрĕн ертÿçи Лира Смирнова Чăваш Енрен килсе уяв туса паракансене Тав хучĕпе чысларĕ, татах та килсе çÿреме чĕнчĕ.
Уява Шупашкарти филармонин «Çеçпĕл» юрă ушкăнĕ вĕçлерĕ. Чылайччен йăхташăмăрсем саланма васкамарĕç, чун каниччен чăвашла ташларĕç, тăван республикăран килнĕ хăнасемпе калаçрĕç.
ЧНК пресс-центре