(9 февраля 2017) Нарăсăн 8-мĕшĕнче Чăваш наци конгресĕн президенчĕ, «Тус» строительсен фирмин тĕп директорĕ, Чăваш Патшалăх Канашĕн депутачĕ Николай Федорович Угаслов 65 çул тултарчĕ!
Сак ятпа ăна саламламлас текенсем кунĕпех татăлмарĕç.Чи малтанах Чăваш Республикин Пуçлăхĕ Михаил Игнатьев, Чăваш Республикин Патшалăх Канашĕн председателĕ Валерий Филимонов, Культура, национальноçсен ĕçĕсен тата архив ĕçĕн министрĕ Константин Яковлев çитрĕç.
Николай Федоровича хисеп тума Мускавран унăн ентешĕ, Тутар Республикинчи Çĕпрел районĕнче çуралса ÿснĕ Валерий Кузнецов генерал-лейтенант, Тутар Республикинчи чăваш наципе культура автономийĕн ертÿçи, Тутар Республикин Патшалăх Канашĕн депутачĕ Дмитрий Самаренкин тата ытти хисеплĕ çынсем те килнĕ.
Чăваш Ен Пуçлăхĕ Михаил Игнатьев тăван республика аталанăвне пысăк тÿпе хывнăшăн Николай Угаслова чунтан тав турĕ. Çакна çирĕплетсе ăна «Чăваш Республики умĕнчи тава тивĕçлĕ ĕçсемшĕн» орденпа чысланине пĕлтерчĕ. Чăн та, нумай ачаллă çемьере пĕчĕкренех ашшĕсĕр тăрса юлса, ĕçченлĕхпе, хăй тăрăшнипе, хăйне кăна шанса, çынсемшĕн яваплăх илсе пысăк çитĕнÿсем тунă Николай Федорович. Хăйĕн ыркăмăллăхĕпе, укçи-тенкине шеллемесĕр мĕн чухлĕ пархатарлă ĕç туман-ши вăл… Миçе чиркÿ вăл пулăшнипе хăпарса ларнă, шкулсем, ача сачĕсем, инкеке лекнĕ уйрăм çынсем мĕн чухлĕ пулăшу илнĕ тата, каласа пĕтерес те çук. Николай Угаслова чăннипех те Чăваш Енре кăна мар, ытти регионсенче те хисеплеççĕ, юратаççĕ, шанаççĕ.
Çакна Чăваш Ен Пуçлăхĕ уйрăмах палăртса хăварчĕ. Михаил Васильевич Чăваш наци конгресне çак пултаруллă та хастар, чăн чăн чăваш чунлă, шанчăклă çынна шанса парса та тĕрĕс тунине асăнчĕ.
-Николай Федорович чăннипех те Чăваш Республикин Хисеплĕ гражданинĕ пулма тивĕçлĕ çын,- палăртрĕ Чăваш Ен Пуçлăхĕ. Чăваш Республикин Патшалăх Канашĕн председателĕ Валерий Филимонов та ун сăмахне çирĕплетрĕ, Николай Угаслова 65 çулпа саламласа çирĕп сывлăх, иксĕлми телей, ăнăçу сунчĕ.
Аякран килнĕ хăна Валерий Кузнецов генерал-лейтенант та хăйĕн ентешне, Çĕпрел районĕнчи Хулаçырми ялĕнче çуралса ÿснĕ Николай Угаслова сумлă çуралнă кунпа чунтан саламларĕ. Пĕрле тăрăшса икĕ çул каялла Çĕпрелте чаплă чиркÿ хăпартнине аса илчĕ. Проектне те тунă, чиркÿ тума та кирпĕчĕсене Николай Федорович панă тата ытти те.
Тутарстан чăвашĕсен пĕрлешĕвĕн тилхепине тинтерех çеç тытнă Дмитрий Самаренкин та Чăваш наци конгресĕн президентне унти чăвашсен ячĕпе ырлăх-сывлăх сунчĕ, пĕрле туслăн ĕçлессе иккеленменнине пĕлтерчĕ.
Дмитрий Сергеевич Тутарстанри Çĕпрел район пуçлăхĕн Хушăвĕпе район аталанăвне пысăк тÿпе хывнăшăн Хулаçырми ялĕнче çуралса ÿснĕ ентешне, Николай Угаслова «Çĕпрел районĕн Хисеплĕ гражданинĕ» чыслă ят панине пĕлтерчĕ, ăна ĕнентерекен хут пачĕ тата Хисеп паллине çакса ячĕ.
Чăваш Республикин Культура, национальноçсен ĕçĕсен тата архив ĕçĕн министрĕ Контантин Яковлев та Чăваш наци конгресĕн президентне чылай ырă сăмахсемпе саламларĕ.- Эсир чăн чăн патриот, çынлăхлă çын, ăслă ертÿçĕ, хăвăр ырми-канми ĕçлесе, çынсемшĕн тăрăшса чăн хисепе çĕнсе илнĕ чăваш,- терĕ Константин Геннадиевич,- Сирĕн ырă тĕслĕхĕр чылай çынна тĕрĕс çул суйлама пулăшнă. Сире пĕтĕм регионсенчи чăвашсем хисеплеççĕ, шанаççĕ,- терĕ вăл.
Салам сăмахĕсем Чăваш наци конгресĕн президенчĕшĕн кунĕпех иксĕлми пулчĕç.
«Эпĕ хам çуралнă куна паллă тăвап тесе те шутламанччĕ, 65 çула юбилей тесе те шутламастăп, никама та чĕнмен те, анчах та мана хисеплекен тус-юлташсен, тăвансен, ĕçтешсен мана калас ыр сăмахĕсем çакăн пек иксĕлми пулни паллах савăнтарать,- терĕ Николай Федорович чунтан.Чăваш наци конгресĕн туслă хастарĕсен те хăйсен ертÿçине калас кăмăллă сăмахĕсем чылай пулчĕç. Президентăн çумĕсем Валерий Клементьев, Петр Ивантаев, Алексей Леонтьев тата ытти ЧНК пайташĕсем те Николай Угаслова тата нумай çул пурăнма сывлăх, çемьере телей, иксĕлми юрату сунчĕç.
Çемье тенĕрен, виçĕ ача çитĕнтерсе çичĕ мăнукĕ савăнтараççĕ халĕ Николай Федоровичпа Ирина Евсеевнăна. Кĕçĕн мăнукĕ, тăватă çулхи Елисей, аслашшĕ çумĕнче хăйне пы ы ысăк çын пек тытса ăна юрăпа та саламларĕ, чăвашла та шутласа савăнтарчĕ. Çакă мар-и вара вăл чăн чăн телей!
Зоя Яковлева, ЧНК пресс-службин ертÿçи