(17 ноября 2016) Чăваш наци конгресĕн президиумĕн черетлĕ ларăвĕ пулчĕ. Кун йĕркинче чылай ыйту палăртнă: конгресс çинчен кĕнеке кăларасси, Чăваш Республикин «Вĕренÿ çинчен» саккунне улшăнусем кĕртесси тата ытти тĕрлĕ ыйтусем. ЧНК президенчĕ Николай Угаслов ларăва ертсе пынă май пĕрремĕш ыйтăва тĕплĕн сÿтсе явма ыйтрĕ. Çитес çул Чăваш наци конгресне туса хунăранпа чĕрĕк ĕмĕр çитет. Халиччен темиçе кĕнеке те тухнă пулсан та, ку çавра çула халалланăскерне тата та анлăрах, пур япалана та шута илсе калăпламаллине аса илтерчĕ Николай Федорович. «Йĕркелесе янăранпа конгресс сахал мар пархатарлă ĕç тунă, çырмалли материал сахал мар, çавăнпа та ку пысăк ĕçе пуçарса яма ĕç ушкăнĕ туса хумалла»,- терĕ вăл ларăва пуçтарăннă президиум пайташĕсене. Канашланă хыççăн ĕç ушкăнне вун тăхăр хастара, редакци коллегине ку ĕçе пĕлекен пилĕк çынна суйласа çирĕплетрĕç.
Кун йĕркинчи иккĕмĕш ыйту та çивĕччи пулчĕ. Президиум кăçалхи çĕртме уйăхĕнче иртнĕ Мăн Канаш йышăнăвне пурнăçласа Чăваш Республикинчи «Вĕренÿ çинчен» саккунне улшăнусем кĕртессине пăхса тухрĕ. Ку ыйтăва уçăмлатма вĕренÿ институчĕн наука сотрудникне, темиçе кĕнеке авторне Елена Михайлова — Еньккана шанчĕç. Вăл Раççейри ытти халăхсен вĕренÿ çинчен калакан саккунĕсене те шута илсе тунă улшăнусен проекчĕпе паллаштарчĕ. Президиум пайташĕсем республикăри Министрсен Кабинетне «Вĕренÿ çинчен» саккуна тăван чĕлхене лайăхрах вĕренме май паракан улшăнусем сĕнме йышăнчĕç. ЧНК президенчĕн çумĕ Алексей Леонтьев конгресăн иккĕмĕш ертÿçи пулнă Геннадий Николаевич Архиповăн 60 çулне халалланă ĕç-пуç йĕркине уçăмлатрĕ. Паллă публициста, общество деятельне Геннадий Архипова асăнса тĕрлĕрен куравсем, анлă «çавра сĕтелсем» ирттерме палăртнă. Чылай организацисене явăçтарса «Чăваш наци культурин чĕрĕлĕвĕн ертÿçисем тата вĕсен шăпи» ятлă «çавра сĕтеле» сумлă та чыслă ирттерме шутлаççĕ гуманитари ăслăлăхĕсен институчĕпе Чăваш наци конгресĕ.
ЧНК президиумĕн черетлĕ ларăвĕнче «Раççей чăваш пики» конкурса хатĕрленесси епле пулса пыни çинчен конгресс президенчĕн пĕрремĕш çумĕ Валерий Клементьев калаçрĕ. Вăл Раççейри тĕрлĕ регионтан пурĕ вăтăра яхăн пике конкурса хутшăнма кăмăл тунине, хатĕрленÿ тапхăрĕ лайăх пулса пынине каласа пачĕ.
ЧНК пресс-служби