(6 ноября 2020) Республикин Конституцийӗ кунта пурăнакан халăхсене пурне те пӗр пек правасемпе тивӗçтерсе хăйсен нацилӗхне упраса хăварма, культурине аталантарма, шкулсенче тăван чӗлхепе вӗрентме майсем туса пачӗ.
Хисеплӗ тăвансем, йăхташсем!
Ноябрӗн 6-мӗшӗ пирӗншӗн, тутарстансемшӗн, питӗ те пӗлтерӗшлӗ кун. Çак кун эпир Тутарстан Републикин Конституцийӗн кунне палăртатпăр. Тӗп закон йышăнни нумай нациллӗ, нумай конфессиллӗ Тутарстан халăхне пӗр чăмăра пуçтарса социаллă-экономика, обществăлла политика, культура, сывлăх сыхлав, вӗрентӳ, промышленноçпа производство енчен вăйлă республика туса хума пулăшрӗ.
Тутарстан Республикин Конституцийӗ кунта пурăнакан халăхсене пурне те пӗр пек правасемпе тивӗçтерсе хăйсен нацилӗхне упраса хăварма, культурине аталантарма, шкулсенче тăван чӗлхепе вӗрентме майсем туса пачӗ. Республикăн аталанăвне чăваш халăхӗ те пысăк тӳпе хывни пире питӗ савăнтарать. Тутарстан ертӳçисем çакна курса пирӗн ӗçе тивӗçлӗ хак параççӗ, ун кирлӗлӗхне палăртаççӗ.
Пирӗн тӗп тивӗç вара гражданла яваплăхлă пулса малалла та республикăн аталанăвӗшӗн, унăн чечекленӗвӗшӗн, нацисен хушшинчи туслăха çирӗплетессишшӗн ӗçлесси. Ун валли республикăра мӗн пур майсем пур.
Тăвансем, сире пурсăра та ТР Конституцийӗн кунӗпе саламлатăп. Çемьере тăнăç пурнăç, ырлăх-сывлăх, телей, ӗçре ăнăçу сунатăп.
Информационный центр ЧНКА в РТ