Елчĕк районĕнчи Лаш Таяпа ял тăрăхĕнче нумаях пулмасть Шăмалакра пурăнакан Николай Андреевичпа Юлия Никитична Печковсен, Лаш Таяпари Владимир Дмитриевичпа Мария Ефимовна Михеевсен ылтăн туйĕсене чăваш йăли-йĕркипе килĕшӳллĕн паллă тунă.
Икĕ мăшăр каллех çамрăклăха таврăннă. Вĕсем каллех хĕрпе каччă пулса тăнă. Вĕсене сумла çак уявпа ялĕпех саламланă. Культура ĕçченĕсем вĕсем валли интереслĕ концерт программи хатĕрленĕ.
Николай Андреевичпа Юлия Никитична пĕр класра вĕреннĕ, пĕр парта хушшинче ларнă. Çамрăк чухне пĕр колхозра ĕçленĕ. Кавказра нумай çул пурăннă. Тивĕçлĕ канăва тухсан тăван тăрăхне таврăннă. Вĕсем икĕ ача пăхса ӳстернĕ.
Мария Ефимовна пĕлӳ илсен Лаш Таяпана ĕçлеме килнĕ. Вăл вулавăшра тăрăшнă. Кунта пулас упăшкипе паллашнă. Вĕсем 3 хĕре, 2 ывăла ура çине тăратнă.
Уявра «хĕрсем» пĕркенчĕк пĕркеннĕ. Мăшăрсем чăваш тумĕ тумланнă. Хăнасем те уява чăвашсен наци тумĕпе пынă.