(22 сентября 2017) ЧНК Ваттисен Канашĕ авăн уйăхĕн 21-мĕшĕнче лару пухрĕ. Кун пек йышлăн пуçтарăнни час- часах пулмасть çулланă хастарсен. Пурĕ Ваттисен Канашĕнче 30 çынна яхăн пулсан, хальхинче ларăва пурте тенĕ пекех килнĕ.
Чăваш наци конгресĕн президенчĕ Николай Угаслов сумлă ватăсене пуçтарăнса килнишĕн тав турĕ, пурне те хастарлăха сыхласа хăварма ырлăх-сывлăх сунчĕ. Кĕскен конгресс ĕçĕ –хĕлĕпе паллаштарчĕ, 10-мĕш Аслă Пухăва ЧНК еплерех хатĕрленни пирки каласа пачĕ.
Ваттисен Канашĕн председателĕ Василий Шадриков ларура ваттисем конгресра чăвашлăха аталантарас енĕпе ирттернĕ ĕçĕсем çинче чарăнса тăчĕ. Унтан çавра çулсемпе Федор Мадурова, Анатолий Кипече тата ытти пайташсене саламларĕ.
Лару хĕрÿ те тухăçлă иртрĕ, чылай хумхатаракан ыйту хускатрĕç ватăсем: тăван чĕлхене вĕрентесси, ял-хула тирпейлĕхĕ, хăш-пĕр чăваш ялĕсен ячĕсене улăштарасси, халăх историйĕпе çыхăннă кĕнекесем кăларасси тата ытти те. Чи çивĕч ыйтусене Аслă Пухура хускатма калаçса татăлчĕç.
Юлашкинчен Ваттисен Канашĕ ЧНК Аслă Пухăвне делегатсем суйларĕ. Сумлă ватăсем квота тăрăх пиллĕк пайташа яваплă мероприятине кайма çирĕплетрĕç.
-Ырă шухăшсем нумай. Мĕн палăртнине пурнăçлама вăй-хăват пултăр. Çамрăксене вĕрентсе пырса, хамăр та пурнăç таппинчен юлмасăр вĕсемпе пĕрле аталанса пырар, ун валли сывлăх пултăр, тытăннă ĕçсене малалла çирĕппĕн туса пырар,- терĕ хисеплĕ ваттăсене ЧНК президенчĕ Николай Угаслов.
ЧНК пресс-служби.