(11 декабря 2015) Паллă ĕнтĕ, тĕп хулара халĕ республикăмăрти кашни районăн тенĕ пекех ентешлĕхĕсем ĕçлеççĕ. Чăваш наци конгресĕ çак пĕрлешÿсемпе туслă çыхăнура.
Хальхи тĕл пулура та Леонид Черкесовпа пĕрле чылай ыйтăва татса пама май тупрĕç ентешлĕхсен ертÿçисем: малашне пĕрле ĕçлеме килĕшÿ тума документсем хатĕрлесси, хулана пурăнма мĕнлерех майпа тата та хăтлă тăвасси, паллă çынсене асăнса палăксем лартасси, Туслăх аллейи тума çĕр уйăрасси тата ытти ыйтусене те пăхса тухрĕç.
Кунтах ЧНКпа ентешлĕхсем пĕрле йĕркелесе пултаруллă ачасене «Чăваш елкине» йыхравлас ыйтăва та пăхса тухрĕç.
Республикăмăрти хуласемпе ялсенчи чи хастар ачасем валли тăван чĕлхемĕрпе, чăвашла юрă-ташăпа йĕркеленĕ Çĕнĕ çул уявĕ кăçал раштавăн (декабрĕн) 25-мĕшĕнче, «Çеçпĕл» кинотеатрта, 14 сехетре пуçланĕ.
Шупашкар хула пуçлăхĕпе Леонид Черкесовпа ЧНК президенчĕ Николай Угаслов сĕннипе ентешлĕхсем ку уява тĕплĕн хатĕрленме калаçса татăлчĕç.