(2 марта 2015) Февралĕн 23-мĕшĕнче Хусанти халăхсен Туслăх çуртĕнче «Хусан чăвашĕсем» ушкăнăн Петĕр Хусанкай сăввипе çырнă «Мунча шăрши» юрă клипĕн хăтлавĕ иртрĕ. Кун пек шайри клип чăвашсен хальччен пулманччĕ тесен те йăнăш мар-тăр.
Туслăх çуртне халăх сахал мар пуçтарăнчĕ çав кун, П.Хусанкай ячĕллĕ ЧНКЦ председателĕ В.Казаков Хусан чăвашĕсене уяв ячĕпе саламланă хыççăн пухăвăн тĕллевĕсене палăртса кун йĕркипе паллаштарчĕ. Паллах, тĕлпулăвăн сăлтавĕ «Мунча шăрши» çĕнĕ юрă клипĕн хăтлавĕ пулчĕ. Çавна кура клипа кăтартиччен малтан унăн историйĕпе «Сувар» хаçатăн тĕп редакторĕ К.Малышев кĕскен паллаштарчĕ.