(14 сентября 2015) Йăлăмра вырнаçнă «Чувашия» санаторин асамлă вырăнĕсенче вырсарникун, авăн уйăхĕн 13-мĕшĕнче финн киноактерĕ Вилли Хаапасало ертсе пыракан пултарулăх ушкăнĕ чÿклеме туни çинчен документлă фильм сыпăкĕсене ÿкерчĕ.
Ку ĕç-пуçа йĕркелекенни ЧНК Ваттисен Канашĕн пуçлăхĕн çумĕ, паллă скульптор тата таврапĕлÿçĕ Федор Иванович Мадуров пулчĕ.
Çак авалхи йăла-йĕркене Федор Мадуров чылай çул ертсе пырать. Хальхинче те кунта унăн ывăлĕ, искусствовед Дмитрий Мадуров, паллă çыравçă Анатолий Кипеч, Николай Фомиряков таврапĕлÿçĕ, Юрий Спиридонов кинопродюссер тата ыттисем те хутшăнчĕç. Чÿклемене ирттернĕ çĕрте ЧНК президенчĕн пĕрремĕш çумĕ Валерий Клементьев тата эпĕ, ЧНК пресс-службин ертÿçи Зоя Яковлева пултăмăр. Чăваш кĕпине тăхăнса чÿк тунă çĕрте хутшăнма та май килчĕ мана.
Çанталăк янкăр уяр та ăшă тăнине пула кинокадрсене хăвăрт ÿкерсе пĕтерчĕç.Вилли Хаапасало ертсе пыракан киноушкăн малалла Йĕпреç тăрăхне çул тытрĕ. Унта вĕсем чăваш сăрине тунине ÿкерес кăмăллă.