(18 мая 2017) Чăваш наци конгресĕн 25 çулне халалласа кĕнеке кăларас ĕç малалла пырать. Çу уйăхĕн 16-мĕшĕнче ЧНК президенчĕ Николай Угаслов, унăн çумĕсем Валерий Клементьев, Петр Ивантаев, Алексей Леонтьев тата редакци коллегийĕ канашлăва пухăнчĕç. Алексей Петрович Леонтьев пухăннисене ĕç мĕнле пынипе паллаштарчĕ, кĕнеке валли пуçтарнă документсем çинчен кĕскен каласа пачĕ. Материал нумай пулнипе Николай Федорович Угаслов кĕнекене икĕ пайлă тума сĕнчĕ. Иккĕмĕшне йăлтах регионсенчи чăваш наципе культура автономийĕсен ĕçĕ-хĕлне халаллама ыйтрĕ. Искусствăсен докторĕ, редколлеги пайташĕ тата нумай кĕнеке авторĕ Алексей Александрович Трофимов хăй пулас кĕнекене мĕнлерех курнине пĕлтерчĕ. «Техника ыйтавĕсене татса панă хыççăн кĕнекен сăн-сăпачĕ, мĕнлерех документсем, статьясем вырнаçтарасси пирки пĕр шухăш патне çитмелле»,- пĕлтерчĕ ЧНК президенчĕ Николай Угаслов.
ЧНК пресс-служби.