(17 октября 2017) Чăваш наци конгресĕн юпа уйăхĕн 28-мĕшĕнче иртекен 10-мĕш Аслă Пухăвне хатĕрленесси хĕрсе пырать.
Паян, юпа уйăхĕн 16-мĕшĕнче конгресс президенчĕ Николай Угаслов, унăн çумĕсем тата ĕç тăвакан комитет пайташĕсем Чăваш Республикин Культура, наци ĕçĕсен тата архив ĕçĕн министерствинче пулчĕç.
Культура министрĕ Константин Яковлев яваплă мероприятине хатĕрленесси епле пулса пынипе кăсăкланчĕ.
Николай Федорович кĕскен хатĕрленÿ тапхăрĕ епле пынипе паллаштарчĕ. Делегатсемпе хăнасене йыхравсем ярса пĕтернĕ. Халĕ ĕçтăвком Аслă Пуху программине хатĕрлессипе тата ытти ЧНК Уставĕ ыйтнă пек тумалли ĕç-пуçа йĕркелет.
Малалла ларура Чăваш Ен тулашĕнчен килекен хăнасене пурăнма вырнаçтарасси, вĕсем валли тĕрлĕ культурăллă программăсем хатĕрлесси пирки калаçрĕç.
Министр ку енĕпе конгресс ĕçченĕсене пулăшма шантарчĕ, Аслă Пухуччен йĕркелÿ ĕçĕ мĕнлерех пулса пынине сÿтсе явма министерствăра тата та пуçтарăнма сĕнчĕ.
ЧНК пресс-служби.