(6 февраля 2017) Нарăс уйăхĕн 3-мĕшĕнче Мускаври Кремль Керменĕнче «Шедевры русской музыки — малым городам и сёлам Руси» ятлă ыркăмăллăх концерчĕ иртрĕ. Вăл «София-2017» фестиваль уçăлнипе çыхăннă.
Концертра Мускаври Пысăк театр солисчĕ, Раççей халăх артисчĕ Владимир Маторин юрларĕ.
Раççей тĕп хулине тĕлĕнмелле хăватлă бас саслă Владимир Маторин юрлакан опера арийĕсене, романссене тата пĕтĕм халăх юратакан юрăсене итлеме ЧНК Хĕрлĕ Чутай, Комсомольски, Элĕк уйрăмĕсем, конгресс хастарĕсем кайрĕç.
«Есть на Волге утёс», «Эй, ухнем», «Степь да степь кругом», «Коробейники», «Вниз по матушке, по Волге», «Вечерний звон» тата ытти халăх юррине итлесе кăмăлĕсене уçрĕç.
Темиçе пин çын вырнаçакан концерт залне Раççейри пурĕ 150 ытла хулапа ялтан ыркăмăллăх концертне çитнĕ.
Концерт пуçланиччен Кремльти Керменĕн фойинче чăвашла тăхăннă «Каçал» «Валенкке» ушкăнсем чăваш ташши-юррипе ытти халăха тĕлĕнтерчĕç.
Чăваш Енрен килнĕ хăнасене Мускаври чăваш наципе культура автономийĕн ертÿçисем тарават кĕтсе илчĕç. Уншăн питĕ пысăк тав вĕсене!
ЧНК пресс-служби.