(22 мая 2017) Çу уйăхĕн 19-мĕшĕнче Чăваш Республикин вĕренÿ институтĕнче шкул ачисемпе студентсен Чăваш Енре Аттепе Анне çулталăкне халалланă чăваш чĕлхипе тата литературипе пĕтĕм тĕнче олимпиади пĕрремĕш хут иртрĕ. Вăйă ăмăртăва 2016 тата 2017 çулсенче чăваш чĕлхипе тата литературипе ирттернĕ регион олимпиадисен 51 çĕнтерÿçипе призерĕ пухăнчĕ. Вĕсен йышĕнче Тутар Республикинчен 3 вĕренекен, Ульяновск облаçĕнчен — 3 тата Пушкăрт Республикинчен — 1 пулчĕç. Ку ушкăнрисем «Чăваш чĕлхи – тăван чĕлхе» олимпиадăра тупăшрĕç.
Олимпиадăн тепĕр енĕ – «Чăваш чĕлхин илемĕ» пулчĕ. Вăл интернет урлă иртрĕ. Кунта Чăваш Республикин тулашĕнче тĕрлĕ регионта пурăнакан чăвашла пĕлекен пĕтĕм тĕнче ачисемпе студентсем хутшăнчĕç.
Вăйă ăмăртăва хутшăнакансене саламлакансен йышĕнче ЧР вĕренÿ тата çамрăксен политикин министрĕ Юрий Исаев, вĕренÿ институчĕн ректорĕ Сергей Савин, И.Я. Яковлев ячĕллĕ Чăваш патшалăх педагогика университечĕн ректорĕ Владимир Иванов, Чăваш наци конгресĕн вĕренÿпе ăслăлăх комитечĕн ертÿçи Геронтий Никифоров тата И.Н. Ульянов ячĕллĕ Чăваш патшалăх университечĕн вырăс тата чăваш филологийĕпе журналистика факультечĕн деканĕ Алена Иванова пулчĕç.
Тĕнче олимпиадине хутшăннă кашни вĕренекене сертификат тата хаклă парне пачĕç.
Тĕп пĕтĕмлетÿре кăçалхи олимпиада çĕнтерÿçисемпе призерĕсен тата вĕсене ăмăртăва тивĕçлĕ шайра хатĕрленĕ чăваш чĕлхипе литератури вĕрентекенсен чыславне каярах ирттерме йышăнчĕç.
Геронтий НИКИФОРОВ,
ЧНК вĕренÿпе ăслăлăх комитечĕн ертÿçи