(8 сентября 2015) Пурăннă пулсан, кăçал чăваш халăхĕн мухтавлă ывăлĕ, икĕ хут Совет Союзĕн Геройĕ, космонавт-летчик Андриян Григорьевич Николаев 86 çул тултарнă пулĕччĕ. Вăл çуралнă кун, авăн уйăхĕн 5-мĕшĕнче, Шуршăлти митинга йышлă халăх пуçтарăнчĕ.
Çăлтăрлă героя асăнма кунта икĕ хут Совет Союзĕн Геройĕ Виктор Горбатко космонавт, ЧР пуçлăхĕн тивĕçĕсене вăхăтлăх пурнăçласа пыракан Михаил Игнатьев тата ытти нумай официаллă çынсем çитнĕ.
Кăçал вара пĕрремĕш хут Шуршăлти А.Г.Николаев музей-комплексне Шупашкар хулинчи районсен ентешлĕхĕсен пуçлăхĕсем пуçтарăнса килчĕç. Вĕсемпе пĕрле ЧНК Президенчĕ, Тутарстан чăвашĕсен ентешлĕхĕн ертÿçи Николай Федорович Угаслов, унăн пĕрремĕш çумĕ, Етĕрне район ентешлĕхĕн пуçлăхĕн çумĕ Валерий Леонидович Клементьев та пулчĕç. Чăваш наци конгресĕ ентешлĕхсене хăй хÿттине илнĕренпе вĕсен хастарлăхĕ ÿссех пыни сисĕнет.
Ентешлĕх ертÿçисем кунти космонавтика музейĕнчи экспонатсемпе паллашрĕç. Музей ăшăлăхне упракан Зоя Степановна Антонова вĕсене кăсăклă япаласем каласа пачĕ, Андриян Николаев çинчен кăларакан çĕнĕ кĕнекене кун çути кăтартма пулăшу ыйтрĕ. ЧНК Президенчĕ Николай Угаслов тата ыттисем те ку пархатарлă ĕçе укçа хума хатĕррине пĕлтерчĕç.
Малалла мухтавлă ентеше, хăй çуралнă ялта канлĕх тупнă Андриян Николаева асăнса районсен ентешлĕхĕсен ертÿçисем ( пурĕ çирĕм район пĕрлĕхĕ пулчĕç кунта ) митинг ирттерчĕç. Малтанах Сĕнтĕрвăрри район ентешлĕхĕн пуçлăхĕ Андрей Геннадьевич Кузнецов ЧНК Президентне сăмах пачĕ.
Шуршăл пуриншĕн те чи сăваплă çĕр пулнине, мухтавлă Андриянăмăр ячĕ чăваш халăхĕн асĕнче ĕмĕр-ĕмĕр упраннине каларĕ Николай Федорович. «Эпир чаплă космонавта, тăван халăхăмăршăн кăна мар, тĕнчешĕн те вышкайсăр ĕç тунă Андриян Григорьевич Николаева яланах сума сăвăпăр, ун ятне çÿллĕрен-çÿле çĕклĕпĕр. Кунта килсен манăн хамăн та вĕçес килет»,- терĕ Николай Угаслов.
Ун хыççăн Ентешлĕхсен пĕрлĕхĕн ертÿçи, Каçалсен ентешлĕхĕн пуçлăхĕ Александр Капитонов, Етĕрнесен ентешлĕхне ертсе пыракан Николай Малов, Канаш енсен ентешлĕхĕн çумĕ Анатолий Кипеч, «Хыпар» издательство çурчĕн директорĕ, чăваш халăх поэчĕ Валери Туркай тата ыттисем те тухса калаçрĕç. Пурте Андриян Николаевăн çутă сăнарне аса илчĕç.
Митинг хыççăн Николай Угасловпа район ентешлĕхĕсен пуçлăхĕсем кунти паркра йывăçсем лартса Ентешлĕхсен аллейине уçрĕç. Кашни район ентешлĕхĕ пĕрер туя йывăççи лартрĕ.
Шупашкар хулинчен килнĕ ентешлĕхĕсен пуçлăхĕсем Шуршăлта çак вăхăтра иртекен «Çавал çăлкуçĕсем» фестивле те çитсе курчĕç, унта хутшăнакансене уявпа саламларĕç.