(23 октября 2017) Чăваш наци конгресне туса хунăранпа чĕрĕк ĕмĕр çитнине халалласа кĕнеке тухрĕ. Çĕнĕ кĕнекен пĕрремĕш экземплярне унăн авторĕ Алексей Леонтьев юпа уйăхĕн 18-мĕшĕнче ЧНК президентне Николай Угаслова кăтартрĕ.
«Чăваш наци конгресĕ. 1992-2017» ятлă кĕнеке пĕтĕмпех конгресс йĕркеленнĕрепе çак куна çитиччен мĕн ĕçленине уçса парать. Документсем, статьясем, тишкерÿсем, хушусемпе йышăнусем, пĕтĕмпех çак кĕнекере. Малашне ЧНК историне пĕлес тесен çак кĕнеке пулăшĕ.
ЧНК президенчĕн çумĕ, журналист тата ăсчах Алексей Петрович Леонтьев çак кĕнекене пухса йĕркелес ĕçе çур çул хушшинче туса ирттерчĕ.
Килес çул кĕнекен иккĕмĕш томĕ кун çути курмалла. Ăна пĕтĕмпех Раççей регионĕсенче ĕçлекен чăваш наципе культура автономийĕсене халалласшăн.
Чăваш наци конгресĕн кун-çулне халалланă кĕнекене кăларма укçа тĕлĕшĕпе Николай Федорович Угаслов пулăшнă.
ЧНК пресс-служби.