(20 января 2016) Чăваш халăхĕн пĕрремĕш хаçачĕн — «Хыпарăн» — кун-çулĕ çăмăл пулман. Пăлхавăрлă вăхăтсенче ăна кăларма та чарнă, хаçат ятне те темиçе хутчен улăштарнă. Самана улшăнса тăнă пулин те тăван халăх «Хыпартан» писмен, ăна çырăнса илсе тавракурăмне анлăлатнă, çĕршыв, тĕнче культурипе пĕтĕçнĕ.
Ахальтен мар ĕнтĕ хаçатăн пĕрремĕш редакторĕ Н.В.Никольский «Хаçат тăрăх ырра вĕренесчĕ» тесе тăван халăха çутта кăларма, культурине ÿстерме, ăс-хакăл пуянлăхне нумайлатма капашлă вăй хунă.
Раççейри пĕрремĕш наци кăларăмĕ «Хыпар» хаçат Чăваш Енĕн пичетпе культура историйĕнче уйрăм вырăн йышăнать. Унăн номерĕсенче республика пурнăçĕ, сулмаклă аталанăвĕ кунсерен, çулсерен çырăнса пычĕ, вăл чăн-чăн энциклопеди пулса тăчĕ.
Тăван халăхшăн ĕçлес миссие хальхи «хыпарçăсем» малалла тăсаççĕ, çынсене кирлĕ информаципе туллин тивĕçтереççĕ, вĕсен культура шайне ÿстерес тĕлĕшпе нимĕнпе виçейми мехел кÿреççĕ.
Чăваш чĕлхине юратма вĕрентесси, ăна аталантарса пырасси, хамăрăн йăла-йĕркене килес ăрусем валли упраса хăварасси, хăвăрт улшăнса пыракан пурнăçри ырă самантсене вулакан патне çитересси «Хыпаршăн» малашне те тĕп тивĕç пулса тăрĕ.
Паян глобализаци, электрон технологисем, вырăсланас юхăм пурнăçăмăрсене «шăл çĕмĕрсе» кĕнĕ чух пире, чăвашсене, чăвашлăха çĕр чăмăрĕ çинчен çухалма парас мар тесе пĕрлешни нихçанхинчен те кирлĕ.
Тăванăмăрсем, çапла пултăр тесе 110 çул тултаракан «Хыпар» хаçат тавра чăмăртанар та çутă малашлăх çулĕпе çирĕппĕн утар!
«Хыпар» издательство çурчĕн сайчĕ