(21 декабря 2016) Ирина, Лидия тата Елена Малинасем раштавăн 18-мĕшĕнче чăваш патшалăх оперăпа балет театрĕнче çак паллă куна уявларĕç.
Савăнăçлă каçа вĕсемпе пайлама тус-юлташĕсем, тăванĕсем, артистсем, вĕсен пултарулăхне сума сăвакансем пуçтарăнчĕç.
Маттур чăваш пикисене саламлама Чăваш Республикин Культура, национальнăçсен ĕçĕсен тата архив ĕçĕн министрĕн çумĕ Вячеслав Оринов, Чăваш наци конгресĕн президенчĕ Николай Угасловпа унăн пĕрремĕш çумĕ Валерий Клементьев, ТутарстанранЧНКА представителĕсем çитрĕç. Пĕртăван Малинасем çуралса ÿснĕ Каçал тăрăхĕнчен те чылайăн килчĕç. Фойере «Каçал» халăх ансамблĕ курма килекенсене савăк кăмăлпа кĕтсе илчĕ.
Çавра çула халалланă концерт илемлĕ те хаваслă иртрĕ, куракансен кăмăлне тултарчĕ.
Ирина, Лидия тата Елена Малинасем конгресс ĕçĕ-хĕлне те хастар хутшăнаççĕ, виççĕшĕ те культура комитечĕн пайташĕсем.
ЧНК хастарĕсем пултаруллă пикесене «Пĕртăван Малинасем» ушкăнăн çавра çулĕпе чун-чĕререн саламлаççĕ, ялан çапла хастар та пултаруллă пулма ырлăх-сывлăх сунаççĕ.