(5 апреля 2018) И.Я.Яковлев çуралнăранпа 170 çул çитнине Теччӗ районӗнчи Кăнна Кушкинче апрелӗн 13-мӗшӗнчех уявлама пуçлаççӗ. Шупашкар делегацине ялти Культурăпа çутӗç комплексӗнче 11:00 сехетре кӗтсе илӗç. Йăла тăрăх, музейре экскурси, И.Я.Яковлев палăкӗ умӗнче митинг пулӗç.
Чăваш Республикинчи хăнасем А.Алкан, И.Максимов-Кошкинскин, Т.Петӗрккин, А.Казакован асăнӳ хăмисене те пуç тайӗç çак кун. Кăнна Кушкинчи мемориал комплексӗнче ялтан тухнă хисеплӗ çынсене асăнса шăп тăрӗç. 13:00 сехетре вырăнти клубра ЧР тата Теччӗ районӗн артисчӗсем концерт кăтартӗç. Унтан Теччӗ хулине çул тытӗç.
Районти Культура керменӗнче 15:00 сехетре «И.Я.Яковлев еткерлӗхӗ – цивилизациллӗ тӗнчен пурлăхӗ» ятпа наукăпа практика конференцийӗ иртет.
Концерт 17:00 сехетре пуçланать. (К. Малышев сăнӳкерчӗкӗ).